Tuesday, April 24, 2007

....لك شتّي

...كنا ستة على النبعة (بس يا زلمة كان في واحد ورانا... قاعد ما عما يعمل شي من أول ما قعدنا... يا ترى ما عما يعمل شي فعلاً؟؟ يا ترى هادا هو المحبوب...حتى نصير سبعة.) .. يا محبوب

قال لو بدا تشتّي كانت غيّمت... بس المشكلة إنو الدنيا صيف ... لك صيـــــــــــــــــــف يا جماعة... شلون بدا تشتي يعني... فهموني بقى... ولذلك رح ضلني مصّيف (ألله يخليلنا هالشمسات)

ما في أحلا من شمس بلادي (لأنو شمس بلادي وبعرفا) ... المهم ما تحمى الشمس كتير حاكم تياب الصيف بتفضح ... والكنزات البودي (ستريتش) ما بتلبقلي...كرشي كبران (طبعاً لا تفهموا كرشي بغير معنى) فعلاً أنا عما إحكي عن كرشي يلي شوي تانية رح يوصل لحلقي... حاكم أنا شغيل كتير بضلني مصلوب ورا هالطاولة ليل نهار ما عما إفضى إلعب رياضة مع إنو ظروف الحياة كتير مواتية للعب الرياضة...فعلاً... بس القرش (مو الكرش) بدو ركد كتير... بتذكر كان في عنا بالمدرسة استاذ ما كان يقول عن الركد ركد؛ كان يقول عنو "ركاظ"... والله... بلا "ركاظ"بالباحة إنت ويا ولا... ولك حَيَوان إنت ويا ... بلا "ركا ا ا ا ا ا ا ـاظ". هلأ الواقع إنو كانت الركيدة توقف ركد .. بس مو لأنو فهمانة شو عما يقول... كانوا يوقفوا من صريخو..

هلأ هو كان معو حق لأنو المدرسة تبعنا ما كانت تستحمل "ركاظ" .. صغيرة يا أخي.. والله صغيرة.. ولازم توسع 500 سعدان مربايين علغالي بالصرماية وأكثر ... وهي يا دوبا توسع لشي خمس عيل بالكثير .. بيت قديم من بيوت بلدي العريقة ..من طين وعنبر.. ولبن وسكر..

هلق يمكن كمان كان حابب يوفر علينا "ركاظ" لأنو لاحقين عالركظ... وأنا اليوم عرفت بالظبط شو يعني "ركا ا ا ا ا ا ا ـاظ " بس المشكلة إنو أنا مقضيا "ركا ا ا ا ا ا ا ا ا ا ا ا ا ـاظ" بس ما عما يروح كرشي ... حاكم بتعرفوا .. الدنيا صيف... وما عما تشتي يا دنيي شتي عالدنيي وأهلا ..

بركي بيطلع زرع جديد وموسمنا بيحلا ..هه.

حقائق علمية غير قابلة للدحض

.

  • من يبدأ نهاره متأخراً ينهيه متأخراً
  • من يقضي أكثر من ثلاثة ساعات في الأكل والراحة وتقرير نوعية الطعام والاستقبالات والمناقشات سوف يصرف ضعف هذه الساعات في محاولة التعويض (1+1 =2)
  • من ينهي عمله الساعة السابعة صباحاً، ولا يترك أي وسيلة لتسليم هذا العمل قبل الساعة الثانية عشرة ظهراً (مثلاً) يعتبر عمله غير مستلم قبل الساعة الثانية ظهراً (1+1 =2)
  • لكل مخلوق من مخلوقات الله أثر يدل عليه، وقد تتنوع هذه الدلالات لتشمل بقايا الطعام أو نتائج الأعمال أو الروائح أو الأصوات.
  • أماكن العمل مقدسة لأنها مصدر رزق العاملين فيها وبالتالي فإن أي مصاريف إضافية لا معنى لها (ترك الأنوار مضاءة، ترك الكومبيوترات مدارة، أعطال غير مبررة في الأدوات، مفقودات غير مفهومة، أقراص مرمية، وقت مهدور، أوراق مرمية، عشوائية في الأرشفة والتنظيم...الخ) تعني خسائر محققة في الوقت والمال والجهد.
  • لكل مجموعة قائد يسير أمورها ويكون مسؤولاً عن نتائج أعمالها، وفي حال لم يستطع هذا القائد ضبط هذه المجموعة وتوجيهها نحو فائدة العمل والإنتاج وتحقيق الأهداف، تتحول هذه المجموعة إلى شراذم وتتحول أهدافها إلى شعارات بعيدة تماماً عن الأهداف.
  • وعد الحر (الزلمة) دين عليه. (وبدون تربيح جميلة)
  • الدين هم في الليل وذل في النهار
  • عندما يكون هناك موعد ملح وقريب للتسليم مع وجود تقصير في الإنتاج لا يصبح لساعات العمل أي معنى أو قيمة، بل تصبح القيمة وتنحصر في التسليم على وقته.
  • التسليم الصحيح لا يكون بعد يوم من موعد التسليم أو نصف يوم من موعد التسليم أو ساعة من موعد التسليم أو عشر دقائق من موعد التسليم
  • التسليم الصحيح للواجبات يكون قبل أربعة وعشرين ساعة قبل موعد التسليم على الأقل
  • تسليم عمل مقبول على وقته أفضل من تسليم عمل ممتاز في غير وقته
  • الاحترام مكتسب وهو مرتبط بالإنجاز والنضوج
  • النضوج مرتبط باحترام المخلوق لنفسه ولغيره ولواجباته ولوعوده
  • مو كل الن.... بيحبل ... مو كل الحبل حلو ...مو كل الحلو مزبوط
  • الأوفيس بوي (الحويص) هو شخص معدوم القدرات التفكيرية والإنتاجية (وبمعنى آخر يادوبو بيعرف يعمل قهوة وشاي وبيعرف ينضف) وإذا لم تنطبق هذه الحالة على (الحويص تبع المكتب) فيعتبر الجميع (حويصة أخلاقياً)
  • إذا لم يكن (حويص) المكتب موجوداً، يعتبر كل فرد (حويص على نفسه)
  • من طلب العلا سهر الليالي
  • لكل شخص "علا" تخصه، في الشركات "علا" الشركة هي الأهم وهي المقياس
  • يلي بدو يتمن....ك لازم يكون عندو جناحات
  • إذا ما حدا شاف شغلك معناتا شغلك مو خالص
  • الإنتاج عملية تجميعية منظمة وليست عملية تراكمية
  • ما لا يتم الواجب إلا به فهو واجب. وبالتالي يعني الإنتاج: هدف الإنتاج +مكونات الإنتاج بما فيها أفكاره + المنتجين +أدوات الإنتاج + آلية إنتاج منظمة + = منتج
  • الإنتاج الممتاز: هدف الإنتاج+ مكونات ممتازة للإنتاج+منتجين ممتازين+أدوات إنتاج (دنب كلب) + آلية إنتاج منظمة+ متابعة حثيثة +رقابة ذاتية+نضوج= منتج ممتاز
  • لا تؤجل عمل اليوم إلى الغد (بغض النظر عن عمل الغد)
  • الأولوية في الشركات المنتجة كالتالي: أقرب موعد تسليم ومن ثم أهم زبون ومن ثم تأتي البقية تبعاً لمخطط العمل
  • الحاجة أم الاختراع (بس أبو الإختراع هو واحد مر أخو شحطة بيعرف كيف يطبق أمو)
  • إن لأهلك عليك حقاً (يوم بالجمعة)
  • ولنفسك عليك حقاً (ساعة جوات الدوام وستعشر ساعة براتو وبإمكانون أهلك يكونو ضمن هالساعات)
  • ولبلدك عليك حقاً (دائماً)
  • ولعملك عليك حقاً (ثمان ساعات أثناء الدوام أو حتى يتم إنتهاء الواجبات)
  • ولربك عليك حقاً (كل الوقت يلي بتصرفو على عبيدو بما فيهون إنتي)
  • المعلم بيفوت عالدوام قبل الشغيلة وبيطلع بعدون (إذا كانوا مو خرج الحمل)
  • يلي معو فلفل بيرش علمخلوطة (وإذا كان بطران بيرش عالمربى)
  • كل العالم غلطانين وأنا صح (يعني أنا حمار)
  • كل العالم صح وأنا غلطان (يعني أنا حمار)
  • ما في حدا صح (يعني أنا حمار)
  • ما في حدا غلط (يعني أنا حمار)
  • إذا أنا حمار يعني في غيري ركيبة
  • مد الإيد من رخاوة الحنك
  • يلي ما بيشغل راسو بيتعّب رجليه
  • غلطة الشاطر بألف (وخمسمية وخمسوتمانين ونص)
  • يلي ما بيشتغل ما بيغلط (بس مو يعني ضلك عما تغلط لأنو الحمار ما بيوقع بالجورة مرتين)، وهذا الكلام ينطبق على جميع الجور، أي بيوقع بجورة وحدة إلى عشر جور كل عمرو مو كل يوم جورة جديدة)
  • كتر الهف بترتف بتكون غالي بترخص (يعني ما تضلك رايح جايي متل بيضات المغربل لأنو بتروح زهوتك)
  • اعمل لآخرتك كأنك تموت غداً، واعمل لدنياك كأنك تعيش أبداً (هادا الكلام لا يعني أن العمل سينتظر إلى الأبد)
  • العمل الإبداعي غير مرتبط بالوحي بل يرتبط بالموهبة يدعمها العلم والعمل الجاد والصبر والصبر والصبر
  • العمل التقني مرتبط بالعلم والتعلم والتجريب والموهبة والصبر والصبر والصبر
  • العمل بشكل عام مرتبط بالأهداف والنضوج والرغبة
  • كل ديك على مزبلتو صياح
  • كل مزبلة وإلا ديك
  • إذا ضلت المزبلة مزبلة بيروح الديك وبتتنضف المزبلة
  • ديوك المزابل ما بيتاكل لحما
  • ريّح غيرك بيريحوك (إلا إذا كانوا م..ن..ا..ي..ك)
  • احترم غيرك بيحترموك (إلا إذا كانوا إخوات ش..ر..م..و.. فهمك كفاية) نشالله ما بيحترموك
  • يلي بيشتغل شغل ثلاثة بيصير معلمون حتى لو ما كانوا مصدقين
  • يلي بيشتغل شغلو بيكون عم يشتغل شغلو (يعني بني آدم)
  • يلي ما بيشتغل شغلو ليش شغلو (ماهيك)
  • كتر النقر بيجيب الفقر
  • الفقر ما بيتعدا على حدا (إلا إذا كان لاطيلو)
  • النوم سلطان (بس السلاطين تقطعت روسون من زمان)
  • النوم ما بيطول العمر (بس بيقلل الشغل)
  • العمر بيخلص بس الشغل ما بيخلص (قالا واحد مو معروف ومارح ينعرف باعتقادي)
  • ألله موجود
  • الملايكة مناح بس البني آدم أحسن لأنو بيفكر (بيختار)
  • الشياطين مو مناح بس بيحبو ألله وبيخافو منو ونازلين طق براغي ببني آدم وخصوصاً لما يصير شيطان أو ملاك (يعني لما ما يعود يختار)
  • كل واحد بينام على الجنب يلي بيريحو (ويلي ما لو مرتاح بالنومة يغيرا) لعمى عالغباء
  • عيني في وتفو عليه (......)
  • لاقيني ولا تطعميني (بس ما تموتني من الجوع...يا مزوق)
  • الأعمال ببداياتها وخواتيمها ومنتصفها (للي بيفهمو)
  • يلي بشوفني بعين بشوفو بعين ويلي بيشوفني بعينتين بشوفو بعينتين (وما حدا بيشوف بتلات عيون إلا إذا كان عندو خطأ جيني)
  • البيض ما بنقلا بضراط (الضراط بس بيطلع ريحة وخمة)
  • لا تضرط وإنتي مسهل
  • يلي بيتو من قزاز لا يشلف على الناس حجارة (إلا إذا كان عندك قزاز من عند المؤيد)
  • الحجر يلي ما بيصيب بيدوش (كذب)
  • الحجر يلي ما بيعجبك بيفجك (إذا كنت غبي ووقفت بوشو)
  • يلي بيضرطلك ضرتلو أحسن ما يفكرك بلا ط..ي..ز
  • مجنون يحكي وعاقل يسمع (أو يضربو على تمو ويكسرلو سنانو)
  • إذا كان رب البيت بالطبل ضارباً، فشيمة أهل البيت الرقص
  • إذا لم يكن رب البيت بالطبل ضارباً، وشيمة أهل البيت الرقص (معناتا مرتو رقاصة وبالتالي لازم يغيرا أو يتعلم يطبل)
  • رافق السبع لو أكلك (بحياة ألله؟)
  • مية كلب يعووا معي ولا كلب يعوي عليي (لعمى شو كلب)
  • السلاح بإيد الخرى بيجرح وبإيد البطل يفلح (إفلح يا بطل)
  • صديقك من بكاك وبكي عليك (مو دائماً)
  • يا مصفاية ما يعيبك بخش (بس البخش بالطنجرة عيب والله)
  • الأرض الواطية بتشرب ميتا ومية غيرا (وخراهون)
  • العنزة الجربانة بتشرب من راس النبعة (أنضف مي)
  • يا أخي بدنا نتجوز (لطي...)
  • إيدنا ولا منّية العالم
  • لم المفلس على المفلس ترى العجب (فعلاً)
  • ألله ما عندو قوالب ليكسرا كل المخلوقات من نفس الطينة ونفس الجلعصة بس الفرق بالمسحوق مو بالغسالة
  • يا أخي الدنية صعبة (أمانة؟ بحياة ربك؟ لعمى والله مالي عرفان، حاكم أنا جديد)
  • يا أخي لا راحة لمؤمن إلا بلقاء ربه (على حسب ربه)
  • يا أخي... (بلا أخي بلا بطيخ)
  • طيب يا حبيبي.. (شو الإثبات؟)
  • طيب يا عمري... (لعمى؟)
  • طيب يا حياتي.. (لا تسب!)
  • إن اللبيب من الإشارة يفهم (إذ كان بدو)
  • إن اللبيب من الإشارة يفهم (إذا كان لبيب)
  • إن اللبيـ.. (خلصنا بقى!)
  • قل اعملوا فسيرى الله عملكم ورسوله والمؤمنون (والأهل والأحباب والجيران والخليقة جمعاء)
  • قل للمليحة بالخمار الأسود...ماذا فعلت بناسك متعبد.. قد كان شمر للصلاة ثيابه..فوقفت له بباب المسجد... يا مليحة تركي بهمو لأنو بدون دف عما يرقص.. لك تركي بركي بيخلص صلاتو وبيروح عالشغل حاجة مقضيا محقن.
  • يا أخي والله فهمك كفاية (.....يمكن!)
  • يمنع التفكير بما سبق منعاً باتاً (وخصوصاً على المفكرين)